libas-e-zist kabhi yuun bhi tera darshan ho
saji saja.i hui jaise koi dulhan ho
ye qaht-e-sher paḌa ho na qaht-e-gham ke sabab
charagh itna hi jalta hai jitna indhan ho
ye main hi huun jo udasi nikalta huun tiri
har ik fasil men lazim nahin ki rauzan ho
tu apne ḳhvab miri aankh se na dekha kar
baratne ke liye behtar hai apna bartan ho
ajiib jaldi thi bachpan men kab baḌe honge
baḌe hue hain to ji chahta hai bachpan ho
kaḌi jo TuuTi to sabit nahin rahi zanjir
aham hai vo bhale chhoTa sa koi bandhan ho
Leave a Reply