Gulzar
ped ke patton men halchal hai khabar-dar se hain
shaam se tez hava chalne ke asar se hain
nakhuda dekh raha hai ki main girdab men huun
aur jo pul pe khade log hain akhbar se hain
chadhte sailab men sahil ne to munh dhanp liya
log paani ka kafan lene ko tayyar se hain
kal tavarikh men dafnae gae the jo log
un ke saae abhi darvazon pe bedar se hain
vaqt ke tiir to siine pe sambhale ham ne
aur jo niil pade hain tiri guftar se hain
ruuh se chhile hue jism jahan bikte hain
ham ko bhi bech de ham bhi usi bazar se hain
jab se vo ahl-e-siyasat men hue hain shamil
kuchh adu ke hain to kuchh mere taraf-dar se hain
Leave a Reply