Saya paDte Hi Zamin Ka Mah Par

saaya paḌte hī zamīñ kā maah par

chal paḌe sab dahriyat kī raah par

bārhā us ko kiyā āgāh par

dil kisī sūrat na aayā raah par

ye bhī dekhā hai hamārī nasl ne

kaT ga.e sar kitne ik afvāh par

haiñ jo asrār-e-zamīñ se nā-balad

tabsira karte haiñ mehr-o-māh par

reza reza ho gayā rishtoñ kā pul

jo Tikā thā sirf rasm-o-rāh par

ham suḳhan-dānoñ ko māl-o-zar se kyā

ham to bak jaate haiñ sirf ik vaah par

ik ishāra to zarā karte kabhī

jaan de dete tumhārī chaah par

jītnī baazī hai jo shatranj kī

rakh nigāheñ har ghaḌī tū shaah par

kyoñ kisī ke aage phailā.ūñ maiñ haath

merā īmāñ hai mire allāh par

kaan koī kyoñ nahīñ dhartā yahāñ

‘shād’ is dil se nikaltī aah par

Leave a Comment