svad-e-gham men kahin gosha-e-aman na mila
ham aise kho.e ki phir tera astan na mila
ghamon ki bazm ki tanha.iyon ki mahfil thi
hamen vo dushman-e-tamkin kahan kahan na mila
ajiib daur-e-sitam hai ki dil ko muddat se
naved-e-gham na mili muzhda-e-ziyan na mila
kise hai yaad ki sa.i-o-talab ki rahon men
kahan mila hamen tera nishan kahan na mila
udhar vafa ka gila hai ki dil lahu na hua
udhar sitam ko shikayat ki qadr-dan na mila
labon ko nutq ka e.ajaz to mila ‘taban’
magar sukut ka pairaya-e-bayan na mila
Leave a Reply