yaar ke bin bahar kya kiije
gul na hove to khaar kya kiije
kaam mera to ho chala akhir
ai mire kirdgar kya kiije
koi vaada vafa nahin karta
vo taghaful shiar kya kiije
misl-e-aina khud-numa mera
sab se ho hai do-char kya kiije
soz-e-dil mera mujh ko de hai jala
aah misl-e-chinar kya kiije
ishq ne kar diya mujhe majbur
ab nahin ikhtiyar kya kiije
misl-e-zulf-e-butan fasana-e-dil
hai tavil ikhtisar kya kiije
guzri jo dil pe mere ho guzri
us ka ab ishtihar kya kiije
dil to gulchin hai tere gulshan ka
le ke gul-ru hazar kya kiije
vo to aata nahin hai mere paas
ai dil-e-be-qarar kya kiije
be-tarah hai mujhe ye mushkil ishq
sahab-e-zulfiqar kya kiije
ai ‘jahandar’ sab jahan dhunda
naiin kui gham-gusar kya kiije
Leave a Reply