surat-e-sabza-e-be-gana chaman se guzre
ham musafir ki tarah apne vatan se guzre
sahl hai na.ara-e-mansur magar sahl nahin
har koi marhala-e-dar-o-rasan se guzre
lala-o-gul ko tabassum ki ziya di ham ne
jalva-e-sub.h ki manind chaman se guzre
hai ye kya raushni-e-fikr ki tira-baḳhti
jalva-e-ruh na pairahan-e-tan se guzre
vo kare tajziya-e-mausam-e-gul jis ki nazar
bazm-e-gul men hadd-e-nasrin-o-saman se guzre
dil pe kya guzri ye dil hi ko ḳhabar hai lekin
muskurate hue ham dar-e-mehan se guzre
na kisi paanv ki aahaT na koi naqsh-e-qadam
qafile ruuh ke yuun kucha-e-tan se guzre
ek zarre men kabhi kho ga.iin kitni kirnen
kitne ḳhurshid kabhi ek kiran se guzre
nik.hat-e-gesu-e-janan bhi ajab thi ‘hurmat’
ham tasavvur men ka.i baar ḳhutan se guzre
Leave a Reply