Poet
kabhi balon ko suljhaya to hota
mujhe shane se uljhaya to hota
bigaḌ jaata abhi munh aa.ine ka
tumhare ru-ba-ru aaya to hota
gul-e-yusuf zuleḳha.i dikhata
chaman men vo aziiz aaya to hota
zaban-e-bosa-e-lab de kar ai yaar
na diide dil ko lalchaya to hota
mujhe varaftagi jaane na deti
va-lekin tum ne bulvaya to hota
vo kahte ghair se kahte par ai dil
zaban par mudda.a laaya to hota
ruḳh-e-rangin tira gar dekhta gul
na uḌ jaata to pattaya to hota
sahare par sahar hoti shab-e-hijr
na aate va.ada farmaya to hota
na paaya tum ko main ne to gila kya
kabhi ḳhud aap ko paaya to hota
masiha.i na karta go vo kafir
janaze par mire aaya to hota
na deta le ke dil vo par bala se
mira dil haath men laaya to hota
main tha gum-karda-e-ishq-e-kamar yaar
kabhi anqa se DhunDhvaya to hota
main karta shukr-e-muqaddam men fida jaan
farishta maut ka aaya to hota
na rahta dast-e-vahshat astin men
junun ne paanv phailaya to hota
main uḌ chalta ba-rang-e-saut-e-naqus
‘vaqar’ us but ne bulvaya to hota
Leave a Reply