Na Ab Wo Ishq Na Wo Ishq Ki Adaen Rahin

Bismil Saeedi

na ab vo ishq na vo ishq ki ada.en rahin

na ab vo husn na vo husn ki hava.en rahin

na ishq ishq raha ab na husn husn raha

na vo vafa.en rahin ab na vo jafa.en rahin

vo husn-o-ishq ke raz-o-niyaz hi na rahe

na vo ḳhata.en rahin ab na vo saza.en rahin

mizaj-e-husn-o-mohabbat men sadgi na fareb

na vo yaqin raha ab na vo dagha.en rahin

ghurur-e-husn ki be-iltifatiyon ki tarah

nigah-e-shauq rahi ab na iltija.en rahin

na vo ayadat-o-taskin na vo dil-e-ranjur

na ab vo dard-e-mohabbat na vo dava.en rahin

na zindagi se vo nafrat na maut ki hasrat

vo bad-dua.en rahin ab na vo dua.en rahin

rabab-e-isq na mizrab-e-husn kuchh bhi nahin

vo naghma-ha-e-tamanna na vo sada.en rahin

na mai-kada na vo mai-ḳhvar aur na vo saaqi

na vo chaman na baharen na vo ghaTa.en rahin

badal ga.e sahar-o-sham-e-zindagi ‘bismil’

vo zindagi ke manazir na vo faza.en rahin