Poet
laa.e to naqd-e-jan sar-e-bazar kya kahen
har shaḳhs hai usi ka ḳharidar kya kahen
ik dastan-e-tesha har ik sang-o-ḳhisht hai
kyuun bolte nahin dar-o-divar kya kahen
us ki gali se pher ke le aa.e jan-o-dil
kitna hai zindagi se hamen pyaar kya kahen
dushman hue hain apne hue jab se us ke dost
ḳhud ko kahen divana ki hoshyar kya kahen
ham bhi vahi hain tum bhi vahi shahr bhi vahi
haa.il magar hai vaqt ki divar kya kahen
saz-e-shikast-e-dil to sada se ḳhamosh hai
hota hai kaise sher men iz.har kya kahen
Leave a Reply