Jashn-E-Azadi

menh barasta hai to dharti ki nazar jhumti hai

phuul khilte hain to gulshan pe nikhar aata hai

lekin ai jashn-e-baharan ke nae muntazimo

khud-farebi se kahin dil ko qarar aata hai

tum agar jashn-e-baharan bhi kahoge is ko

maut ke ghaat ye dhoka bhi utar jaega

bad-e-sarsar ko agar tum ne kaha mauj-e-nasim

is se mausam men koi farq nahin aaega

ye gulistan ye gulistan men sisakte ghunche

apne aamal ke parde men inhen Dhanp to lo

eqtidar aaj bhi sargarm-e-safar hai lekin

be-navaon ke iradon ko zara bhanp to lo

aaj insan ki azmat ne kiya hai elaan

khud-farebi se koi ji ko na bahalaega

jab tak araish-e-gulzar nahin ho jaati

kisi konpal kisi ghunche ko na chain aaega

lekin ai jashn-e-baharan ke nae muntazimo

ye tamasha hamen be-kar nazar aata hai

menh barasta hai na dharti ki nazar jhumti hai

phuul khilte hain na gulshan pe nikhar aata hai

Leave a Comment