Ahsan Marahravi
mujhe ḳhabar nahin gham kya hai aur ḳhushi kya hai
ye zindagi ki hai surat to zindagi kya hai
fughan to ishq ki ik mashq-e-ibtidai hai
abhi to aur baḌhegi ye lai abhi kya hai
tamam umr isi ranj men tamam hui
kabhi ye tum ne na pucha tiri ḳhushi kya hai
tum apne ho to nahin gham kisi muḳhalif ka
zamana kya hai falak kya hai muddai kya hai
salah-e-kar banaya hai maslahat se use
vagarna naseh-e-nadan ki dosti kya hai
dilon ko khinch rahi hai kisi ki mast nigah
ye dilkashi hai to phir uzr-e-mai-kashi kya hai
mazaq ishq ko samjhoge yuun na tum naseh
laga ke dil kahin dekho ye dil-lagi kya hai
vo raat din nahin milte to zid na kar ‘ahsan’
kabhi kabhi ki mulaqat bhi buri kya hai
Leave a Reply