hausla de de ke uncha mera sar us ne kiya
zulm ke aage mujhe sina-sipar us ne kiya
pyaar se sab dushmanon ke dil men ghar us ne kiya
dosti ka ma.arka is tarah sar us ne kiya
jin ko piine ka saliqa tha na jiine ka shu.ur
band un logon pe maiḳhane ka dar us ne kiya
pahle to divar uTha.i shahr ke charon taraf
phir usi divar men ik roz dar us ne kiya
pahle apna gham tha par us ka tha ab duniya ka hai
dhire dhire ek paude ko shajar us ne kiya
kaun si shai thi jo is dharti ke daman men na thi
phir na jaane kyuun ḳhalaon ka safar us ne kiya
jo ‘ḳhalish’ vaqif na the sher-o-suḳhan ke naam se
aam un logon pe ‘ghalib’ ka hunar us ne kiya
Leave a Reply