Na Ho Jis Ko Kisi Ka Gham Use Kahiye to Kya Kahiye

Poet

na ho jis ko kisi ka gham use kahiye to kya kahiye

jo sun kar haal ho barham use kahiye to kya kahiye

sabab hove to kiije tark kahiye be-sabab yaaro

ḳhafa hota ho jo har dam use kahiye to kya kahiye

bhali kar ke kahen us se to vo maane bura ulTa

jo shirini ko samjhe sam use kahiye to kya kahiye

nashe men raat din maḳhmur rahta hai vo ghairon men

hai us ka aur hi aalam use kahiye to kya kahiye

maza kahne ka ye hai ik kahe aur dusra maane

jo ho har baat men barham use kahiye to kya kahiye

samajh achchhe bure ki ho to kuchh kahna bhi lazim hai

ho yaksan jis ki madh-o-zam use kahiye to kya kahiye

zabani haal qasid se bhala ham ‘aish’ kya kahte

jo hove shaḳhs-e-na-mahram use kahiye to kya kahiye