kabhi ai ashk-e-tar ankhon se Dhal paḌ
kabhi ai ah-e-dil munh se nikal paḌ
na ai pa-e-tasavvur itna shal paḌ
kabhi tu la-makan se aage chal paḌ
hua vo but na do din bhi kabhi raam
jahannam men tu ai ilm-o-amal paḌ
vo raqsan bazm men hain tu bhi ai dil
kabhi to vajd men aa kar uchhal paḌ
kisi din to kabhi ai abr-e-rahmat
mire bait-ul-huzan men bhi unDal paḌ
gul-e-ariz pe un ke misl-e-bulbul
kabhi o tifl-e-dil tu bhi machal paḌ
mire aage kabhi haath apne dho kar
raqibon ke bhi pichhe ai ajal paḌ
bahe go alam-e-imkan par ai chashm
kabhi to surat-e-zamzam ubal paḌ
nibhi ik pal kabhi jis se na ai dil
usi sarkash ke phir qadmon pe chal paḌ
kabhi o sher-e-vasf-e-sa.id-e-yar
mire ḳhame ke bhi sanche se Dhal paḌ
‘vaqar’ us bazm men tu bhi sadaf-var
dahan-e-pak se moti ugal paḌ
Leave a Reply