ajiib halat hai jism-o-jan ki hazar pahlu badal raha huun
vo mere andar utar gaya hai main ḳhud se bahar nikal raha huun
bahut se logon men paanv ho kar bhi chalne-phirne ka dam nahin hai
mire ḳhuda ka karam hai mujh par main apne pairon se chal raha huun
main kitne ash.ar likh ke kaghaz pe phaaḌ deta huun be-ḳhudi men
mujhe pata hai main azhdaha ban ke apne bachche nigal raha huun
vo tez andhi jo gard uḌati hui ga.i hai tabhi se yaaro
gali ke nukkaḌ pe baiTha baiTha main apni ankhen masal raha huun
abhi to aghaz hai safar ka abhi andhere bahut milenge
tum apni sham.en bacha ke rakkho charagh ban kar main jal raha huun
Leave a Reply