Sarshar Siddiqui
ik harf-e-shauq lab pe hai aur iltija ke saath
main ik na.e safar pe huun apni ana ke saath
main ne ibadaton ko mohabbat bana diya
ankhen buton ke saath rahin dil ḳhuda ke saath
kis qaht-e-etibar se guzre hain ahl-e-dil
rang-e-vafa bhi uḌ gaya rang-e-hina ke saath
mera vajud harf-e-taqaza bana hua
mohr-e-qubul us ke labon par haya ke saath
gul-chehra logon se tha mira bhi muamla
avara main bhi ho gaya mauj-e-saba ke saath
na-mustajab itni dua.en huiin ki phir
mera yaqin bhi uTh gaya rasm-e-dua ke saath
ghar yaad aa raha tha chale aa.e hain magar
ham apne sar pe laa.e hain sahra uTha ke saath
abadiyon ki ḳhair manane ka vaqt hai
jangal ki aag phail rahi hai hava ke saath
Leave a Reply