Kya Khabar Thi Ek Bala-e-Na-Gahani Aaegi

kya ḳhabar thi ik bala-e-na-gahani aaegi

na-muradi ki nishani ye javani aaegi

sab kahenge kaun karta hai hamare raaz faash

jab mire lab par mohabbat ki kahani aaegi

na-muradi se kaho munh pher le apna zara

meri duniya men urus-e-kamrani aaegi

jab ḳhizan ki nazr ho jaegi duniya se shabab

yaad ‘aḳhtar’ ye sitam-ara javani aaegi

Leave a Comment