Sheen Kaaf Nizam
ik saa.en saa.en ghere hai girte makan ko
aur ankhen takti hain chamakti chaTan ko
chaḌhte hi mere ho ga.i divar se alag
hasrat se dekhta huun usi nardban ko
andeshe duur duur ke nazdik ka safar
kashti ko dekhta huun kabhi badban ko
zindan-e-roz-o-shab men hai ham sab ko umr-qaid
koi bacha.e aa ke mire ḳhandan ko
yadon ke shor-o-ghul men khaḌi ghar ki ḳhamoshi
avaz de rahi hai kisi mehrban ko
barson se ghumta hai isi tarah raat din
lekin zamin milti nahin asman ko
Leave a Reply