Rang Laegi Iltija Meri

rañg lā.egī iltijā merī

sun hī legā kabhī ḳhudā merī

zabt-e-ġham ko duā.eñ detā huuñ

rah ga.ī ghuT ke har sadā merī

us kī banda-navāziyāñ dekho

baḳhsh detā hai har ḳhatā merī

sunñe vāloñ ke dil taḌap uTThe

sāz-e-ġham ban ga.ī sadā merī

vasl mumkin nahīñ visāl sahī

ab to kuchh aur hai duā merī

be-sahāroñ kā aasrā tū hai

kaun suntā tire sivā merī

ye mashiyyat ke raaz haiñ ‘shañkar’

ibtidā merī intihā merī

Leave a Comment