poet

Ba-Chaman Ab Wo Kiya Chahe Hai Mai-Nosh Guzar

ba-chaman ab vo kiya chahe hai mai-nosh guzar

jald ai paik-e-saba gul ke ye kar gosh-guzar

nahin maalum kahan jaate hain juun nashsha-e-mai

jidhar in rozon men ham karte hain madhosh guzar

bazm men mujh ko jo dekha to ye jhunjhla ke kaha

aisi mahfil men kare hai miri pa-posh guzar

sar-nigun kucha-e-rusvai men hain aaj talak

sau kharabi se jo is dar pe kiya dosh guzar

ashiq us parda-nashin ke hain ki gar samne se

kabhi guzre hai to karta hai vo ru-posh guzar

chand roza hai ye mai-khana-e-hasti yaan to

umr ghaflat men na ai be-khirad-o-hosh guzar

aa phansa ishva-o-andaz-o-ada men yuun dil

rahzanon men kare juun rah-faramosh guzar

ham-safar hain to ye hasrat hai ki kiije koson

ik savari men hue us se ham-aghosh guzar

qadr-dan koi sukhan ka na raha ai ‘jurat’

kunj-e-tanhai men auqat tu khamosh guzar

More Poems

Leave a Comment