Ameer Qazalbash
ḳhud apne saath safar men rahe to achchha hai
vo be-ḳhabar hai ḳhabar men rahe to achchha hai
qadam qadam yunhi rakhna dilon men andesha
charagh rahguzar men rahe to achchha hai
kabhi kabhi mire daman ke kaam aa.egi
ye dhuup dida-e-tar men rahe to achchha hai
main dil ka haal na aane duun apni palkon tak
ye ghar ki baat hai ghar men rahe to achchha hai
kiya hai tund havaon ka samna jis ne
vo phuul shaḳh-e-shajar men rahe to achchha hai
Leave a Reply