misal-e-mauja-e-ḳhusbu bikhar ga.e mire din
guzar ga.iin miri raten guzar ga.e mire din
dua-e-nim-shabi be-asar ga.i meri
tumhare hote hue be-samar ga.e mire din
javab arz-o-sama se na ban paḌa koi
main un se puchh raha tha kidhar ga.e mire din
bas ek baar mohabbat se dil hua ḳhali
phir us ke ba.ad udasi se bhar ga.e mire din
main mubtala-e-gham-e-raftagan hua aisa
mujhe ḳhabar na hue aur mar ga.e mire din
yahi malal mujhe sub.h-o-sham lahaq hai
mire sabat se kaise mukar ga.e mire din
vafur-e-hijr hadon se guzar gaya tha ‘na.im’
mujhi pe dekhiye ilzam dhar ga.e mire din
Leave a Reply