Raz Ehtisham
rusva kiya hai us ne jahan-bhar ke samne
parde men chhup gaya hai mujhe kar ke samne
sajda hai inhidam hai kya hai mujhe bata
qasr-e-badan gira hai kisi dar ke samne
uryani baḌh rahi hai mire ghar ke bichon-bich
divaren uTh rahi hain mire ghar ke samne
ye vaqfa-e-namaz bhi kitna tavil hai
kab se khaḌa huun yaar ke daftar ke samne
kaise charagh se karun shikva ki jab miri
chashm-e-nazara bujh ga.i manzar ke samne
puchhe koi jo raaz ke dil ka to ye kaho
ik ghar hai aur ghar bhi samundar ke samne
Leave a Reply