ahmad-rahi

Wo Be-Niyaz Mujhe Uljhanon Mein Dal Gaya

vo be-niyaz mujhe uljhanon men Daal gaya

ki jis ke pyaar men ehsas-e-mah-o-sal gaya

har ek baat ke yuun to diye javab us ne

jo khaas baat thi har baar hans ke taal gaya

kai saval the jo main ne soch rakkhe the

vo aa gaya to mujhe bhuul har saval gaya

jo umr jazbon ka sailab ban ke aai thi

guzar gai to laga daur-e-e’tidal gaya

vo ek zaat jo khvab-o-khayal laai thi

isi ke saath har ik khvab har khayal gaya

use to is ka koi ranj bhi na ho shayad

ki us ki bazm se koi shikasta-hal gaya

More Poems

Leave a Comment