ghaflat men hui auqat basar ai umr-e-gurezan kuchh na kiya
sab chalne ke the saman baham chalne hi ka saman kuchh na kiya
vaaiz ne bhare kham chuur kiye tar kar di zamin ai pir-e-mughan
zalim ne zara bhi tera lihaz ai rahbar-e-iman kuchh na kiya
aamal ki zishti ka badla main kah nahin sakta kya milta
bheja bhi agar dozakh men tujhe ai sahab-e-iman kuchh na kiya
mai piine ka dil men josh na tha zahir ki talab thi hosh men aa
saaqi ne milaya zahar agar ai munkir-e-ehsan kuchh na kiya
maana ki badi saffak hai tu bil-farz badi jallad hai tu
main jiita raha ta-subh agar to ai shab-e-hijran kuchh na kiya
taklif kisi ko gar pahunchi tu is men takalluf kya nikla
hairan jo rakha qatil ko to ai shab-e-hijran kuchh na kiya
ulta na iraq-o-sham-o-halab duniya na hui viran to kya
jal-thal na lahu se to ne bhara to khun-e-musalman kuchh na kiya
sunta huun adu ko khaak kiya mitti men milaya ghar us ka
phunka na jala kar mujh ko agar tu ai shab-e-hijran kuchh na kiya
kya ji ke karunga main tanha yaan taab kahan baaqi dil ko
be-maut ke ab maara na mujhe to dagh-e-azizan kuchh na kiya
jumbish se tiri maqtal hota ik aan men dasht-e-karb-o-bala
ushshaq ki bebaki ka evaz ai abru-e-barran kuchh na kiya
ai nang-e-jahan ai ‘shad’ bata kuchh sharm bhi tujh ko hai ki nahin
ai jehl-e-murakkab ai haivan ai be-khabar insan kuchh na kiya