Der Mein so Kar uThne Wale

der meñ so kar uThne vaale

paḌe haiñ bistar uThne vaale

chaa.e kī barakat se ḳhālī haiñ

der meñ aksar uThne vaale

shor nahīñ is chup kī talāfī

dil meñ bavanDar uThne vaale

haa.e vo dīvānoñ ke sar haiñ

aah vo patthar uThne vaale

ḳhatm hue ḳhvāboñ ke tamāshe

aañkh se manzar uThne vaale

chehroñ kī bīmār latāfat

haath meñ sāġhar uThne vaale

yuuñ bhī kuchal detī hai hasrat

yādoñ ke sar uThne vaale

aas ke vo mad.hosh bagūle

rāhguzar bhar uThne vaale

dhuup kaḌī hai din lambā hai

aur ye mahshar uThne vaale

Leave a Comment