Wahshi Ishq-E-Junun Kam Bhi Nahin Karta Hai

vahshī ishq-e-junūñ kam bhī nahīñ kartā hai

aur yuuñ bhī hai ki ab ram bhī nahīñ kartā hai

toḌ bhī letā hai vo rabt-e-ināyat ham se

rishta-e-dard ko mohkam bhī nahīñ kartā hai

us kā shikva nahīñ kar sakte ki vo dil ke ta.iiñ

ḳhush nahīñ kartā to barham bhī nahīñ kartā hai

mujhe dīvār-e-anā se vo girātā bhī nahīñ

aur ūñchā mirā parcham bhī nahīñ kartā hai

tabr-o-teġh hamārī bhī dharī hai kab se

chheḌ muddat huī aalam bhī nahīñ kartā hai

Leave a Comment