pahaḌon ko bichha dete kahin khaa.i nahin milti
magar unche qadam rakhne ko uncha.i nahin milti
akela chhoḌta kab hai kisi ko la-shu.ur-e-tan
kisi tanha.i men bharpur tanha.i nahin milti
ghanimat hai ki ham ne chashm-e-hasrat paal rakkhi hai
zamane ko ye hasrat bhi mire bhaa.i nahin milti
fusun-e-reg men maujen bhi hain daldal bhi hote hain
magar sahra samundar the ye sachcha.i nahin milti
tiri ḳhalis kiran ki aag hai taif-e-tasavvur men
quzah banti nahin mujh men to bina.i nahin milti
nichoḌi ja chuki hai miTTi ikahra ho gaya paani
anasir mil bhi jaate hain to ra.ana.i nahin milti
ghazal kah ke sukun ‘tafzil’ milta hai magar miTTi
ise laava ugal kar bhi shakeba.i nahin milti
Leave a Reply