rakha pa jahan men nagara zamin par
bahut sar ko vaan ham ne maara zamin par
junun josh maare hai divar-o-dar se
hua kis pari ka guzara zamin par
nahin hai ye ah-e-falak sa ki ham ne
alam shor-e-sauda ka gadha zamin par
qadam jis jagah rakkha us sang-dil ne
na ho vaan ba-juz sang-e-khara zamin par
nazar se tiri jis ne ham ko giraya
falak se utha kar ke maara zamin par
tu ru-e-zamin dekh le sair ho kar
na hoga guzar phir dobara zamin par
tire naqsh-e-pa ko kahe apna ham-sar
nahin hai ye munh to hamara zamin par
vo zohra-jabin mehrban hove ‘hasrat’
kahan hai ye apna sitara zamin par
Leave a Reply