basharat ho ki ab mujh sa koi pagal na aa.ega
ye daur-e-aḳhir-e-divangi hai biit ja.ega
kisi ki zindagi zaa.e.a na hogi ab mohabbat men
koi dhoka na dega ab koi dhoka na kha.ega
na ab utrega qudsi koi insanon ki basti par
na ab jangal men charvaha koi bheḌen chara.ega
giroh-e-ibn-e-adam laakh bhaTke laakh sar paTke
ab is andar se koi rasta bahar na ja.ega
bashar ko dekh kar be-intiha afsos aata hai
na ma.alum is ḳharabati ko kis din hosh aa.ega
miTa bhi de mujhe ab ai musavvir! ta-ba-kai aḳhir
banega bigaḌega bigaḌega banega
mohabbat bhi kahin ai dost! tardidon se chhupti hai
kise qaa.el karega tu kise bavar kara.ega
ghanimat jaan agar do bol bhi kanon men paḌ jaa.en
ki phir ye bolne vaala na ro.ega na ga.ega
‘shu.ur’ aḳhir use ham se ziyada jante ho tum?
bahut sidha sahi lekin tumhen to bech kha.ega
Leave a Reply