ik aag dekhta tha aur jal raha tha main
vo shaam aa.i magar haath mal raha tha main
ye umr kaise guzari bas itna yaad hai ab
udaas raat ke sahra pe chal raha tha main
bas ek zid thi so ḳhud ko tabah karta raha
nasib us ke ki phir bhi sambhal raha tha main
bhari thi us ne rag-o-pai men barf ki ThanDak
so ek barf ki surat pighal raha tha main
ḳhuda-sifat tha vo lamha ki jis men gum ho kar
zamin se asman ke dukh badal raha tha main
main ek ahd tha ik ahd ki alamat tha
hazar chehron men din raat Dhal raha tha main
bas ek abr ke saa.e ne aa liya mujh ko
azaab oḌh ke ghar se nikal raha tha main
Leave a Reply