fasurda ho ke maiḳhane se nikle
yahan bhi apne begane se nikle
shafaq ka rang gahra kar gae aur
jo sho.ale mere kashane se nikle
zara ai gardish-e-dauran Thaharna
vo nikle rind maiḳhane se nikle
gham-e-dil ka asar har bazm men hai
sab afsane us afsane se nikle
kiya abad virane ko ham ne
hamin abad virane se nikle
jo pahunche daar tak mansur the vo
hazaron rind maiḳhane se nikle
nikalte ham na gham-ḳhane se ‘aḳhtar’
hasin mausam ke bahkane se nikle
Leave a Reply