Murli Dhar Shad
munh tira kyuun aaj zor-e-na-tavani phir gaya
us ke aate hi mire chehre pe paani phir gaya
bhuul kar ashiq tumhara ja raha tha tuur par
duur se sun kar sada-e-lan-tarani phir gaya
zillat-o-rusva.i ki had bhi hai koi Duub mar
ai dil-e-nakam ab to sar pe paani phir gaya
us ke aage tu ne phailaya agar dast-e-saval
yaad rakh ai dil suluk-e-mehrbani phir gaya
dil miTaya teri ḳhatir jaan ki parva na ki
kis liye tu ham se ai ahd-e-javani phir gaya
be-sutun ko kaaT kar laaya tha zalim ju-e-shir
kohkan ki hasraton par phir bhi paani phir gaya
pattiyan pazhmurda phulon ki chaman men dekh kar
samne ankhon ke daur-e-aish-e-fani phir gaya
kal khili thi jo kali hai aaj murjha.i hui
meri nazron men ma.al-e-zindagani phir gaya
bul-havas ka munh ho kaala kaan men kya kah diya
aap ke chehre pe rang-e-arghavani phir gaya
barq ban kar aaj vo mahfil men aa.e is tarah
meri ankhon men mira ahd-e-javani phir gaya
bhar ke saaqi ne diya jam-e-sharab-e-arghavan
‘shad’ ke chehre pe rang-e-shadmani phir gaya
Leave a Reply