ghar mujhe bech ke ab raḳht-e-safar lena hai
ghalati hi sahi ik baar to kar lena hai
zarf ye hai ki tujhe dasht men paani ki talash
aur mujhe ḳhushk samundar se guhar lena hai
apne andar jo chhupa rakha hai us ne ik raaz
vo ijazat to nahin dega magar lena hai
kyon jalata hai ye sahra mujhe malum hai sab
apne daman ko miri raakh se bhar lena hai
ishq ko naam kisi rishta-e-taqdis ka den
yahi ilzam ba-andaz-e-digar lena hai
Leave a Reply