ta-ba-aflak agar apni rasa.i hoti
kuchh ta.ajjub nahin qabze men ḳhuda.i hoti
naseha ham ko tabi.at pe jo qaabu hota
dil si daulat sar-e-bazar ganva.i hoti
maut ne mujh ko faramosh kiya ḳhuub kiya
aap ne aankh na ai kaash chura.i hoti
meri miTTi ko Thikane jo lagaya tha tujhe
su-e-but-ḳhana ye kam-baḳht uḌaa.i hoti
sab ko tum saghar-e-zarrin men pilate ho sharab
hamen talchhaT hi shikore men pila.i hoti
raat din shaiḳh-e-haram kalima buton ka paḌhta
but-kade men jo kabhi us ki rasa.i hoti
bhulte ham na kabhi bad-e-saba ka ehsan
kakul-e-yar ki ḳhushbu jo sungha.i hoti
puchhta main bhi mizaj aap ka shoḳhi se yunhi
choT dil ki jo kahin aap ne khaa.i hoti
tha azal se dil-e-‘azam’ men koi aur makin
us men kya ishq hasinan ki sama.i hoti
Leave a Reply