Abdul Ahad Saaz
lafz ka dariya utra dasht-e-maani phaila
misra-e-ula hi men misra-e-sani phaila
kahin chhupa hota hai davam kisi lamhe men
yuun to hai sadiyon pe jahan-e-fani phaila
danai ki duniya tang hai pechida hai
ya-rab kuchh asani kar nadani phaila
daman-e-tar hi men to hai ashkon ki nami bhi
rahne de dharti par yunhi paani phaila
manfaaten hi darj hain sab ki fard-e-amal men
varaq kushada kar thodi nuqsani phaila
kirdaron ki pahchanen gum hone lagi hain
mere lekhak itna bhi na kahani phaila
Leave a Reply