harf raushan the numayan dard ki tahrir thi
us ka chehra tha ki mere karb ki tafsir thi
kuchh miri ankhon men bhi tha Dubte rangon ka aks
us ghaḌi vo mohni surat bhi kuchh dil-gir thi
an-ginat hisson men yuun taqsim ho kar rah ga.i
zindagi jaise mire ajdad ki jagir thi
haath phaila.e khaḌi thi jo bhare bazar men
vo mire iflas ki munh bolti tasvir thi
dekhti thi aane vaali sub.h-e-nau ka rasta
muntazir zindan-e-shab men duḳhtar-e-kashmir thi
pujti thi har na.i surat ko avara nazar
garche paaon men muqaddas ahd ki zanjir thi
ik parinda par-shikasta aur suuna rasta
kis qadar sachchi mire halat ki tasvir thi
Leave a Reply