nahin ma.alum jiine ka hunar kaisa rakha hai
hamen halat ne jaise rakha zinda rakha hai
miri pagal tabi.at ka hai koi pair na sar
nahin dariya mila to aankh men sahra rakha hai
tumhen jis samt se aana hua be-ḳhauf aana
tumhare vaste charon taraf rasta rakha hai
mire jaisi udasi shahr men kis ko mili hai
mira jaisa kisi ne kab bujha chehra rakha hai
vo jitne bhes badle main use pahchan lungi
ki main ne aankh men us shaḳhs ka naqsha rakha hai
tumhare vasl ki iftari aa.e ya na aa.e
magar main ne tumhare hijr ka roza rakha hai
kisi ke hijr men bhuli huun baaqi rang saare
miri almari men har suiT ab kaala rakha hai
Leave a Reply