nahin ki pand-o-nasihat ka qaht paḌ gaya hai
hamari baat men barakat ka qaht paḌ gaya hai
to phir ye radd-e-munajat ki nahusat kyuun
kabhi suna ki ibadat ka qaht paḌ gaya hai?
malal ye hai ki is par koi malul nahin
hamare shahr men hairat ka qaht paḌ gaya hai
suḳhan ka khokhla hona samajh se bahar tha
khula ki harf ki hurmat ka qaht paḌ gaya hai
kahin kahin nazar aa.e to aa.e misra-e-tar
nahin to sher men lazzat ka qaht paḌ gaya hai
nasib dil ko bhala kab rahi faravani
aur ab to vaise bhi muddat ka qaht paḌ gaya hai
magar ab aisi bhi koi andher-nagri nahin
ye Thiik hai ki mohabbat ka qaht paḌ gaya hai
nahin main sirf ba-zahir nahin hua viran
darun-e-zat bhi shiddat ka qaht paḌ gaya hai
kahan ga.iin mire gaanv ki raunaqen ‘javvad’
to kya yahan bhi rivayat ka qaht paḌ gaya hai
Leave a Reply