Ayub Khawar
hava ke ruḳh pe rah-e-e’tibar men rakkha
bas ik charagh ku-e-intizar men rakkha
ajab tilism-e-taghaful tha jis ne der talak
miri ana ko bhi kunj-e-ḳhumar men rakkha
uḌa diye ḳhas-o-ḳhashak-e-arzu sar-e-rah
bas ek dil ko tire iḳhtiyar men rakkha
na jaane kaun ghaḌi thi ki apne hathon se
uTha ke shisha-e-jan is ghubar men rakkha
ye kis ne misl-e-mah-o-mahr apni apni jagah
visal o hijr ko un ke madar men rakkha
lahu men Dolti tanha.i ki tarah ‘ḳhavar’
tira ḳhayal dil-e-be-qarar men rakkha
Leave a Reply