akhtar-hoshiyarpuri

Mere Lahu Mein Usne Naya Rang Bhar diya

mere lahu men us ne naya rang bhar diya

suraj ki raushni ne baḌa kaam kar diya

hathon pe mere apne lahu ka nishan tha

logon ne us ke qatl ka ilzam dhar diya

gandum ka biij paani ki chhagal aur ik charagh

jab main chala to us ne ye zad-e-safar diya

jaaga to mahtab ki kunji sirhane thi

main ḳhvab men tha jab mujhe raushan nagar diya

us ko to us ke shahr ne kuchh bhi diya nahin

aur us ne phir bhi shahr ko tohfe men sar diya

mera badan to radd-e-amal men ḳhamosh tha

meri zaban ne zaiqa-e-ḳhushk-o-tar diya

vo harf-ashna hai mujhe ye guman na tha

us ne to sab ko naqsh-ba-divar kar diya

yuun bhi to us ne hausla-afzai ki miri

harf-e-suḳhan ke saath hi zaḳhm-e-hunar diya

aḳhtar yahi nahin ki mujhe bal-o-par mile

us ne to umr bhar mujhe ehsas-e-par diya

More Poems

Leave a Comment