Syed Amin Ashraf
ye aankh tanz na ho zaḳhm-e-dil hara na lage
mujhe qarar to ho ya use haya na lage
fishar-e-jan ho to kaifiyat-e-mukammal ho
vo iztirab to ho iztirab sa na lage
vo ru-ba-ru ho to ara.ish-e-bayan bhi na ho
ki main kahun to kisi aur ka kaha na lage
muamalat-e-mohabbat mizaj rakhte hain
tabi.aten hon jo yaksan to fasla na lage
ḳhizan-rasida chaman men bhi jhulti ho bahar
gulon se rang kali se mahak juda na lage
yahi to hoti hai vaz-e-shaguftan-e-mahtab
miyan-e-abr ho ya asman khula na lage
vahi to dard hai jo dard-e-ma-siva samjhe
rifaqaten hon to aalam nigar-ḳhana lage
alam to ḳhair alam hai ki pa.edar nahin
vabal hai jo ḳhushi bhi gurez-pa na lage
ulajh rahi hain ḳhayali uḌaan se ankhen
kahin navishta-e-divar be-sada na lage
Leave a Reply