niind to main kama ke laata huun
ḳhvab lekin chura ke laata huun
tum shajar ko zara dilasa do
main parinde bula ke laata huun
aks ke aag men utarne tak
aa.ine men saja ke laata huun
le to aata huun dasht ankhon men
paniyon ko dikha ke laata huun
phal ki qismat hai pak ke gir jaana
aur main Tahni hila ke laata huun
mujh ko mujh bin kahin nahin hai qarar
shahr saara ghuma ke laata huun
rasta jugnuon ka aadi hai
main diye ko bujha ke laata huun
aap kyon tirgi se laḌte hain
raushni ko mana ke laata huun
aag laata huun maang ke lekin
apna qissa suna ke laata huun
Leave a Reply