mubtala ek but ka hota huun
aaj iman apna khota huun
tegh-e-abru ke tiir ishq men yaar
jaan se apni haath dhota huun
jaan legi ye muft ki begar
bar-e-ranj-e-firaq Dhota huun
ghote khata huun bahr-e-ulfat men
haal par apne aap rota huun
ek jhuTe ke vasf-e-dandan men
sachche moti sada pirota huun
dil lagata huun un ki mizhgan se
apne haq men ye kanTe bota huun
gham men ik mah-vash ke ashkon se
daman-e-asman bhigota huun
baḳht-e-ḳhufta ka huun dil-e-bedar
kaun shab ai ‘vaqar’ sota huun
Leave a Reply