Mohammad Naim Jawed Naim
sach zabanon par ho to shanon pe sar rahte nahin
pattharon ke shahar men shishe ke ghar rahte nahin
chhoḌ kar mujh ko chala hai to pata hoga use
reg-zaron men kabhi nazuk shajar rahte nahin
chand lamhon ke liye milna hai bas un ka nasib
der tak shab aur suraj ham-safar rahte nahin
koi kitna bhi ho pyara ho hi jaata hai juda
zaḳhm jitne bhi hon gahre umr bhar rahte nahin
us ki andhi ki tarah fitrat baḌi pur-josh thi
aise mausam men diye hon ya sharar rahte nahin
ya to ho jaao mire ya chhoḌ do mera ḳhayal
darmiyane se marasim mo’atabar rahte nahin
toḌ lena shaḳh se ḳhud un ko behtar hai ‘na.im’
der tak pak kar daraḳhton par samar rahte nahin
Leave a Reply