Saeed Ahmad Akhtar
ye sadma us ko pagal kar gaya tha
vo apne aa.ine se Dar gaya tha
koi bhi sar nahin tha us ke qabil
abas us shahr men patthar gaya tha
jahalat ke havale paḌhte paḌhte
kitabon se mira ji bhar gaya tha
pilata kaun us pyase ko paani
koi masjid koi mandar gaya tha
vo kis miTTi ka tha nafrat ke ghar men
vo oḌhe pyaar ki chadar gaya tha
mira ehsas to tere karam se
mire marne se pahle mar gaya tha
na nikla phir vo saari umr ghar se
zara si der ko bahar gaya tha
to phir luuTa hai kis ne qafile ko
udhar to sirf ik rahbar gaya tha
vahan phir pair kab rakkha kisi ne
jahan raste men mera sar gaya tha
Leave a Reply