patta huun andhiyon ke muqabil khaḌa huun main
girte hue daraḳht se kitna baḌa huun main
parcham huun raushni ka mira ehtiram kar
tarikiyon ka rasta roke khaḌa huun main
mere hare vajud se pahchan us ki thi
be-chehra ho gaya hai vo jab se jhaḌa huun main
mat soch ye ki meri kisi ne nahin suni
ye dekh apni baat pe kitna aḌa huun main
ab us ke rabte bhi mire dushmanon se hain
jis ke vaqar ke liye ‘az.har’ laḌa huun main
Leave a Reply