Aziz Aae Madad Ko Na Gham-Gusar Aae

Javed Vashisht

aziiz aa.e madad ko na gham-gusar aa.e

zamane bhar ko musibat men ham pukar aa.e

samajh saki na ḳhirad jab tire ishare ko

junun nasib hamin the jo su-e-dar aa.e

milega tohfa-e-dil ke evaz nashat ki gham

kise ḳhabar hai ki jiit aa.e ham ki haar aa.e

junun ki abla-pa.i se phuul khilte ga.e

na jaane kitne bayaban ham nikhar aa.e

hamare paas bhi kahne ko hain bahut baten

magar kahe ka hamare jo e’tibar aa.e

shikast-e-jam pe ro.e shikast-e-dil pe hanse

kuchh aise lamhe bhi ‘javed’ ham guzar aa.e