poet

Wo Kya Hai Tera Jis Mein Jalwa Nahin Hai

vo kya hai tira jis men jalva nahin hai

na dekhe tujhe koi andha nahin hai

kahan daman-e-husn ashiq se atka

gul-e-dagh-e-ulfat men kanta nahin hai

kiya hai vahan us ne paiman-e-farda

yahan hai vo shab jis ko farda nahin hai

vo kahte hain main zindagani huun teri

ye sach hai to un ka bharosa nahin hai

miri ziist kyuun kar na ho javedani

jo marta hai us par vo marta nahin hai

vahi khaak udana vahi gardishen hain

ye maana ki ashiq bagula nahin hai

gulu-gir hai un bhavon ka tasavvur

gareban men apne kantha nahin hai

in ankhon ko jab se basarat mili hai

siva tere kuchh main ne dekha nahin hai

miri hasraten is qadar bhar gai hain

ki ab tere kuche men rasta nahin hai

vo dil kya jo dilbar ki surat na pakde

vo majnun nahin hai jo laila nahin hai

kamal-e-zuhur-e-tajalli se jaana

jo pinhan nahin hai vo paida nahin hai

More Poems

Leave a Comment