kishwar-naheed

Dil Ko Bhi Gham Ka Saliqa Na Tha Pahle Pahle

dil ko bhi gham ka saliqa na tha pahle pahle

us ko bhi bhulna achchha laga pahle pahle

dil tha shab-zad use kis ki rifaqat milti

khvab tabir se chhupta raha pahle pahle

pahle pahle vahi andaz tha dariya jaisa

paas aa aa ke palatta raha pahle pahle

aankh ainon ki hairat nahin jaati ab tak

hijr ka ghaao bhi us ne diya pahle pahle

khel karne ko bahut the dil-e-khvahish-dida

kyuun hava dekh jalaya diya pahle pahle

umr-e-ainda ke khvabon ko pyasa rakkha

fasla paanv pakadta raha pahle pahle

nakhun-e-be-khabari zakhm banata hi raha

ku-e-vahshat men to rasta na tha pahle pahle

ab to us shakhs ka paikar bhi gul-khvab nahin

jo kabhi mujh men tha mujh jaisa tha pahle pahle

ab vo pyasa hai to har buund bhi puchhe nisbat

vo jo dariyaon pe hansta raha pahle pahle

vo mulaqat ka mausam nahin aaya ab ke

jo sar-e-khvab sanvarta raha pahle pahle

gham ka dariya miri ankhon men simat kar puchhe

kaun ro ro ke bichhadta raha pahle pahle

ab jo ankhen huiin sahra to khula har manzar

dil bhi vahshat ko tarasta raha pahle pahle

main thi divar to ab kis ka hai saaya tujh par

aisa sahra-zada chehra na tha pahle pahle

More Poems

Leave a Comment